Lencana Facebook
Blogger news
Popular Posts
-
PELANTIKAN PENGURUS OSIS Assalamu’alaikum Wr.Wb. Nuwun, Dhumateng Bapak Kepala sekolah SMP Tunas Muda ingkang dhahat kinurmata...
-
GEGURITAN Geguritan iku iketaning basa kang awujud syair. Mula ana kang ngarani syair Jawa gagrag anyar. Tembung geguritan asale sak...
-
Cangkriman Cangkriman yaiku tetembungan utawa unen-unen kang kudu dibatang maksude. Dene W...
-
PEPALI LAN WANGSALAN I 1. Nateng kaga, canthing bumbung dhuh bendara, (garudha, Para mudha, sun tuturi piyarsakna. ...
-
Gamelan Kapan anane gamelan? Wangsulane para sedulur warna-warna. Ana sing ngendika, gamelan tuwuhe j aman Demak. Ana maneh sing... -
A. Pranatacara 1. Werdine Pranatacara Pranatacara uga diarani master of ceremony (MC), pembawa acara, pambiwara, pran...
-
Ayo Gotong Royong Kembang-kembang terong Mbang terong megare sore Ayo gotong royong Gotong royong...
-
1. Abange kaya godhong katirah. 2. Putih memplak kaya kapuk diwusoni. 3. Kuning pindha mas sinangling. 4. Kaya jambe... -
Lakon Mayangkara, disanggit dening Sang Maestro dhalang Ki Nartosabdo. Ing perangan iki,isi wawan gunem antarane Badan Wadhag-e kalawan Bad...
About
Sabtu, 25 Januari 2014
PAHARGYAN
LUSTRUM KAPING 12 SMP TUNAS MUDA
Assalamu’alaikum, Wr.Wb.
Bapak Kepala SMP Tunas Muda ingkang satuhu luhuring
budi,
Ustadz Drs. Sunardi Syahuri ingkang satuhu pantes sinudarsana
Bapak/Ibu alumni SMP Tunas Muda ingkang satuhu kinurmatan
Sagung tamu undhangan ingkang satuhu dhahat
kinurmatan
Bapak/Ibu Guru, Karyawan- karyawati SMP Tunas
Muda ingkang tansah winantu ing suka basuki.
Kadang wredha, taruna, miwah para siswa SMP
Tunas Muda ingkang kula tresnani.
Keparenga kula mambeng saha
nggempil kamardikan panjenengan sadaya, awit kula piniji panitya
kinen ngaturaken urut reroncening Adicara
Puncak Pahargyan Lustrum kaping 12 SMP
Tunas Muda.
Nanging
saderengipun kula ngaturaken rantamaning adicara punika, sumangga kula
dherekaken ngonjukaken puji syukur wonten sahandhap pepadaning Gusti ingkang
hakarya loka inggih Allah SWT, karana sih wilasa miwah barokah ingkang rumentah
dhumateng panjenengan sedaya dalasan kula, satemah ing kalenggahan punika
taksih saged kempal manunggal kanthi pinayungan gumelaring kabagaswarasan, karaharjan miwah katentreman,
tebih saking rubeda nir ing sambekala. Amin.
Sagung tamu undhangan ingkang sinuba ing pakurmatan, keparengan
panatacara murwakani lekasing sedya ingkang punika enggal badhe binuka
lampahing titilaksana Adicara Puncak
Pahargyan Lustrum kaping 12 SMP
Tunas Muda. , kanthi ngaturaken
urut reroncening adicara ingkang sampun
karantam dening panitya, nun inggih:
- Pambuka
- Pasrah bebungah tumrap para juara pasanggiri (Penyerahan Hadiah Lomba)
- Pangandikan Kepala SMP Tunas Muda kalajengaken Pagas Tumpeng
- Tausyiah Syukur dening Ustadz Drs. H. Sunardi Syahuri
- Pasrah - tinampi ringgit wacucal (Semar) (Kepala SMP Tunas Muda – dhumateng Ki Dhalang Edhi Suwondo)
- Panutup.
- Pagelaran Ringgit purwa sedalu natas kanthi Lampahan : “Rama Nitis – Semar Boyong” ingkang badhe katindakaken dening Ki Dhalang Edhi Suwondo.
Para Bapak/ Ibu tamu undhangan ingkang sathuhu dhahat kinurmatan, makaten
menggah urut reroncening Adicara Puncak
Pahargyan Lustrum kaping 12 SMP
Tunas Muda ing dalu punika.
Kasuwun wontena suka lilaning penggalih sagung tamu
undhangan tansah hanjenengi ngantos
dumugi paripurnaning adicara ing dalu punika. Nuwun, nuwun, matur nuwun.
…………………………………………………………………………………..........................
Sagung
tamu undhangan ingkang satuhu kinurmatan,
Sumangga
adicara ing dalu punika kapurwakan kanthi ndedonga jumbuh kaliyan
kapitadosan sowang-sowang, dhumateng Bapak ibu tamu
undhangan ingkang hangrasuk agami Islam
kula dherekaken maos Basmallah sesarengan, wondene ingkang ngrasuk agami sanes
kajumbuhna kaliyan gegebengan panjenengan,
ndedonga kawiwitan …….cekap.
Ngancik adicara kaping
kalih : Pasrah bebungah tumrap para juara pasanggiri kangge mahargya pengetan Lustrum 12 SMP
Tunas Muda ing tahun 2013.
Dumateng ngarsanipun Seksi Lomba pandaya wara kula aturaken.
......................................................................................................................................................
Makaten Pasrah
bebungah tumrap para juara pasanggiri kangge mahargya pengetan Lustrum 12 SMP
Tunas Muda ing tahun 2013.
Dumateng para juara kaaturaken ndherek
bingah miwah matur nuwun awit partisipasinipun.
Ngancik
adicara kaping tiga atur pangandikan Kepala
SMP Tunas Muda kalajengaken pagas tumpeng . Dhumateng
ngarsanipun Bapak Drs. Suradi, M.Pd.
wekdal saha pandaya wara kaaturaken. Sumangga…………………………………………………………………………………
Kalajengaken pagas tumpeng. Sasampunipun tumpeng
kapagas dening Bapak Kepala SMP Tunas Muda badhe kapasrahaken dhumateng ngarsanipun Ibu
Dra. Niken Larasati pinangka pangarsa
panitya Lustrum 12 SMP Tunas Muda
Sagung tamu minulya. Tumpeng tumrapipun tiyang Jawi
nggadhahi pralambang saha tuntunan gesang Tumpeng saged dipunjarwani: Tumapaking
penguripan, tumindak lempeng. Tegesipun tumpeng mujudaken panggantha
utawi panyuwunan dhumateng Gusti Ingkang Maha Agung, supados tiyang ingkang
munjukaken donga saha panggantha punika kalis ing sambekala, saha pikantuk
kanugrahan, sarta lumebering sihing Pangeran.
Para
leluhur sampun paring wasitatama bilih: “Lantiping panggrahita, landhepe
panyakrabawa, gumantung ana titining ati sumaruna bangkit nyaring sarining
sasmita” Gesang punika kebak sasmita sarta pralambang ingkang semu.
Manungsa kedah sadhar. Kalamun kirang
ing waspada saged dhawah wonten ing barang semu punika.
Sagung
tamu minulya .Ndungkap adicara kaping sekawan :
Tausyiah
Syukur dening Ustadz Drs. H. Sunardi Syahuri
Dhumateng ngarsanipun
Ustadz Drs. H. Sunardi Syahuri wekdal saha sasana wara kula aturaken. Sumangga.
…………………………………………………………………………………………………..
Pangandikan ingkang mijil saking lesanipun ustadz
Drs. H. Sunardi Syahuri ingkang sampun putus ing kawruh ngelmu agami, dhasar wasis ngrumpaka endahing
basa, saestu saged dados pandam pandom pandulunipun Sagung tamu undhangan
mliginipun ingkang tansah nggegulang
gesang kautamen. Mugi-mugi punapa ingkang sampun dipunaturaken tansah
dipunbundheli ing salebetipun ati sanubari miwah dipuntindakaken brayat ageng
SMP Tunas Muda .
Dhumateng ngarsanipun Ustadz Drs. H. Sunardi Syahuri.
kaaturaken sewu agunging panuwun ingkang tanpa pepindhan.
Bapak/ Ibu tamu undhangan ingkang satuhu kinurmatan.
Ngancik adicara kaping
gangsal: Srah tinampi tokoh ringgit Semar saking Kepala SMP Tunas Muda dhumateng ngarsanipun Ki Dhalang Edhi Suwondo.
Dhumateng ngarsanipun Bapak Drs. Suradi, M.Pd. dalah Ki Dhalang Edhi Suwondo wekdal saha pandaya wara kula
aturaken. Sumangga!
………………………………………………………………………………………………
Ingkang salajengipun
Bapak Kepala SMP Tunas Muda kepareng
hamasrahaken paraga/tokoh ringgit Semar dhumateng Ki Dhalang Edhi Suwondo.
Bapak/ Ibu sagung tamu undhangan ingkang minulya kanthi
paraga Semar ingkang sampun kaasta dening Ki Dhalang Edhi Suwondo ateges
pagelaran ringgit purwa sadalu natas kanthi Lampahan “Rama Nitis – Semar
Boyong” tumuli kawiwitan.
Sagung
tamu minulya kanthi punika reroncening
Adicara Puncak Pahargyan Lustrum kaping 12 SMP Tunas Muda ndungkap paripurna
Dhumateng sedaya pehak ingkang sampun
paring panyengkuyung murih gancar miwah regenging pahargyan Lustrum kaping 12 SMP Tunas Muda panitya ngaturaken sewu agunging panuwun ingkang
tanpa upami.
Wondene kula pribadhi ingkang
ndherekaken lampahing adicara ing dalu punika bok bilih kirang runtut
tumapaking adicara, kirang edi miwah kirang leres rumpakaning basa, kirang
mapan ing reh subasita, kula nyuwun agunging samodra pangaksami. Tebah siti
sekul binuntel roning kalapa. Apuranta menawi wonten lepat kawula.
Sumangga adicara ing dalu punika
kapungkasan kanthi ndedonga jumbuh kaliyan agami wiwah kapitadosanipun
sowang-sowang. Dhumateng ingkang ngrasuk agami Islam kula dherekaken maos
Tahmid sesarengan. Sumangga ………………. Matur Nuwun.
Wekdal salajengipun kula aturaken dhumateng Ki
Dhalang Edhi Suwondo sakanca. Sugeng wungon- sugeng hamriksani pagelaran
ringgit purwa sedalu natas kanthi Lampahan “ Rama Nitis – Semar Boyong” ingkang
katindakaken dening Ki Dhalang Edhi Suwondo saking Pajangan, Sleman, miwah
dipunregengaken Bintang Tamu: Ibu
Yuningsih utawi Mbok Dhe Beruk .
Wasana
kanthi asesanti Jaya-jaya wijayanti SMP Tunas Muda tansah jaya. Dirgahayu SMP Tunas Muda Nuwun- nuwun – Matur Nuwun.
Wassalamu’alaikum
Wr. Wb.
Langganan:
Posting Komentar (Atom)
0 komentar:
Posting Komentar